ОТВОРЕН СОСТАНОК НА КЛУБ НА МЛАДИ

На вчерашниот редовен состанок на Клубот на млади при Црвен крст Охрид присуствуваа над 30 волонтери. Во пријатна и инспиративна атмосфера се разговараше за повеќе теми од интерес на младите, меѓу кои дисеминација на Црвениот крст, програмата „Зелен волонтеризам“ и превенција од трговија со луѓе.

Дисеминација на Црвениот крст

Волонтерите се запознаа со историјата и мисијата на Движењето на Црвениот крст и Црвената полумесечина. Преку едукативна презентација беа објаснети седумте основни принципи – доброволна служба, универзалност, хуманост, непристрасност, неутралност, независност и единство – како темел на секоја волонтерска активност и израз на вистинска хуманост.

Програма „Зелен волонтеризам“

Во продолжение беше претставена програмата „Зелен волонтеризам“, насочена кон поттикнување на младите да се грижат за природата и околината. Волонтерите дискутираа за можни идни активности како садење дрвја, акции за чистење и едукативни кампањи за еко-свесност и одржлив начин на живот.

Превенција од трговија со луѓе

Последниот дел од состанокот беше посветен на темата превенција од трговија со луѓе. Преку кратка едукативна сесија и отворена дискусија, волонтерите се запознаа со начини на препознавање на ризични ситуации и добија идеи како да придонесат во подигнување на свеста кај своите врсници.

Како и после секој состанок, следеше неформална дружба во пријатна атмосфера, каде младите волонтери имаа можност да се поврзат, да споделат идеи и да се забавуваат заедно. Таквите моменти ја зајакнуваат тимската енергија и чувството на припадност во Клубот.

#ЦрвенКрст#ЦКмлади#МладиЗаОхрид