Симулација на заедничка реакција на тим на АРМ, тим на МВР и тимови на ПСС при Црвен крст Охрид во случај на авионска незгода на планински и тешко пристапен терен

Во изминатите денови, имав чест и одговорност да бидам евалуатор на 2 вежби за планинско спасување, кои планинската спасителна служба (ПСС) од Охрид ги изведуваше со специјалните едници на МВР (во првата) и специјалните единици на АРМ (во втората акција).

Првата вежба беше симулација на заедничка реакција на хеликоптерски тим на МВР и тимови со возила на ПСС, во случај на авионска незгода на планински, тешко пристапен терен.

Втората вежба беше симулација на заедничка реакција на тим на АРМ и тимови на ПСС, со четири теренски возила, со реакција и на хеликоптер на АРМ – во случај на заглавен тандем параглајдерски тим на планински, тешко пристапен терен.

Вака, многу на кратко срочено ова…

Што за мене е важно и ми носи радост во случајов: во повеќе наврати сум ја споделувал мојата нескриена восхитеност, од нивото на капацитет кој се создаде во ПСС Охрид. Од секој аспект: човечки (обучени момци и девојки) и материјален (опрема на највисоко ниво за пристап на планина во секакви услови). ПСС Охрид е веќе репер за највисока класа на единица од ваков тип!

Гледајќи ги пак, како рамо до рамо, изведуваат ваква вежба на волку високо ниво – ми носи и надеж! Кратко пред вежбата, за време на нејзиното одржување и по нејзиното одржување, посебно со припадниците на специјалната единица на АРМ и хеликоптерскиот тим – комуникацијата нивна со членовите на ПСС беше како помеѓу пријатели кои се познаваат со децении, а не денови.

Среќен сум што се воспоставија убави човечки односи – кои сега веќе почиваат на меѓусебно поголемо разбирање, почитување и конечно – комуникација. Комуникација која и тоа како е потребна помеѓу овие чинители, во една многу брзорастечка заедница во Македонија која почнува да влегува во планините, веќе полека во секакви услови; за населението кое живее во нив, како и за се’ поголемиот број и на туристи кои сакаат да ја откриваат и уживаат Македонија.

Се надевам дека овие вежби ќе продолжат и во иднина. Само така ќе има и многу поедноставна комуникација и доверба и на терен – и во реални ситуации.

Честитки Планинска Спасителна Служба Охрид! 

Превземено од: Игор Талевски, @https://www.facebook.com/igor.talevski.104