Операција Флориан

Во рамки на соработката на Црвен крст Охрид со Операција Флориан од Манчестер, Англија, во тек се интензивни обуки за прва помош, основна и напредна специјализирана и приспособена обука за спасителите на вода и спасителите на планина, специјализирани обуки за спасување на вода, управување со моторен чамец и извлекување давеници, дејствување во случај на поплави, пребарување и спасување на планина и непристапни терени.

Обуките започнаа на 17 мај и ќе траат до 30 мај, ги водат 15 инструктори од Операција Флориан, а ги посетуваат членови на тимовите за укажување прва помош на Црвен крст Охрид, спасители на вода, членови на Планинската Спасителна Служба на Црвен крст Охрид, членови на Националниот Сојуз за планинско спасување во Македонија, како и членови на Територијалната противпожарна единица од Охрид и членови на доброволните противпожарни друштва.

Соработката на Црвен крст Охрид со Операција Флориан започна уште 2010 година и во текот на изминатите 15 години се зацврсти во вистинско партнерство кое во многу придонесува за ефикасно справување со ризиците и делување во случај на несреќи и катастрофи.