Градоначалникот на општина Охрид Г-дин Кирил Пецаков во посета на Планинската Спасителна Служба при Црвен крст Охрид

Остварена средба на градоначалникот Кирил Пецаков во придружба на Претседателот на Советот на Општина Охрид, Сашо Донев и Секретарот на Општина Охрид, Александар Китески со претставници од Планинската спасителна служба. При посетата градоначалникот Пецаков беше запознаен со целокупната опрема и стручниот кадар со кои располага службата за спасување.

“На средбата со членовите на службата беше разговарано за тековните проекти како и за подготвеноста за делување на непристапен планински терен. Заеднички беше заклучено дека Службата за спасување на планина е од исклучително значење за подигнување на нивото на безбедност на планинарите во Охридскиот регион. Исто така, беше разговарано и за можностите за поддршка на службата како и за соработка во насока на промоција на Охрид како безбедна дестинација за развој на планинарски туризам и промоција на планинарските спортови, информираат од Општина Охрид.“

Во моментов, во Планинската спасителна служба волонтираат петнаесетина спасители обучени да делуваат на комплексен технички терен, како и повеќе од 30 волонтери, искусни планинари, обучени за логистика, пребарување и спасување на нетехнички планински терен.